Saturday, September 27, 2014

එහෙමත් සෙනසුරාදාවක් යළි නොම වෙයං සදා !!!

'' ඒයි... නැගිටපන් බං. 6.45 යි වෙලාව '' 

කාමර සගයා මගේ උරහිස සොළවමින් මට අවදි කළේය. මොහු මගේ කාමර සගයා පමණක්ම නොවේ. එකම ආයතනයේ මා සමග සේවය කරනා කාර්යාල සගයා ද වේ.

'' මං තව චුට්ටකින් නැගිටිනවා... අද ට‍්‍රැෆික් එකත් නෑනෙ.''

සතිය මැද දිනක නම් මා ඒ වන විටත් ඇහිරිලාය. 

සාමාන්‍යයෙන් සතියේ මැද දිනයන්හි කොලඹ නගරයේ අධික මාර්ග තදබදයක් පවතී. එමනිසා නවාතැනේ සිට කාර්යාලය වෙත යෑමට විනාඩි 45ක් පමණ ගත වන අතර මාර්ග තදබදය එතරම් නැති සෙනසුරාදා දිනයන්හි ඒ සඳහා ගත වන්නේ විනාඩි 25කටත් අඩු කාලයකි.

වැඩකරන දින අතරින් මඳක් වැඩිපුර නිදාගැනීමට අවස්ථාව ලැබෙන්නේ සෙනසුරාදා දිනයන්හි පමණක් බැවින්, මුළු සිරුරම වැසෙන සේ හොඳින් පොරවාගෙන යළිත් මම ඇඳෙහි ගුළි වුණෙමි.

'' ඒයි... නැගිටපන් යකෝ.... 7.10 යි වෙලාව. අද උඹ   ඕෆ් ද ? ''

හිස මඳක් ඔසවා, කොට්ටයට එපිටින් තිබූ ජංගම දුරකතනය ගෙන වෙලාව බැලීමි. වේලාව 7.10 ය. අවදි වීම සඳහා 7.15ට තැබූ එලාම් එක ද ඕෆ් කර දමා, මම ඇඳෙන් බැස ගත්තෙමි. තට්ටු දෙකේ ඇඳක් වූ මෙයින් උදෑසන බැස ගැනීම ද එතරම් පහසු කාර්යයක් නොවේ.

ඒ වන විටත් මගේ කාමර සගයා ඇඟපත පිරිසිදු කරගෙන හමාරය. වෙනදා මුලින්ම නැගිටින්නේ මා වුව ද, අද ඔහු මටත් කලින් ඇහැරිලාය.

තුවාය ද කරට දමා, දත් බුරුසුව ද රැගෙන මම නානකාමරයට රිංගුවෙමි. දත් ටික මැද, ක්‍ෂණිකව නා ගතිමි. කුමන හෝ ගමනක් යාමට තිබේ නම්, පාන්දර දෙකට තුනට වුව නා ගැනීම මගේ වසර ගණනාවක පුරුද්දක් වන අතර මුළු දවසම ප‍්‍රබෝධයෙන් සිටීම සඳහා  එය මට මහත් පිටිවහලක් ගෙන දේ.

තුවාය සහ තෙතබරිත කලිසම වැල්පොටෙහි වනා, මම ලහි ලහියේ වැඩට යන්නට සූදානම් වුණෙමි.

ඒ වන විට වේලාව 7.30 පසු වූවා පමණි. 

සෙනසුරාදා දිනයන්හි උදෑසන 8.15 වන විට කාර්යාලයට වාර්තා කිරීමට නම්, 7.40ට පෙරවත් නවාතැනෙන් පිට විය යුතු අතර සතියේ දිනක නම් 7.20ටවත් පිට විය යුතුය.

'' අද මට උණ හැදෙන්න වගේ... ඇඟට කිසි ෆිට් එකක් නෑ බං... ෂෝර්ට් ලීව් එකක් දාලා වේලාසනින් ගෙදර ගියොත් අවුලක් වෙන එකක් නෑනෙ.'' මගේ සගයා ඔහුගේ ඇඳුම් රාක්කය අසළ සූදානම් වන ගමන් මගෙන් ඇසීය.

'' නෑ... අසනීපයක් නම් ඉතින් අවුලක් නෑනෙ... හදිසි වැඩ තියෙන ඒවා ඉවර කරලා 10.00ට විතර උඹ ඕෆ් වෙයං...'' බිමට නැමී සපත්තු යුගළ පයෙහි දමා ගන්නා ගමන් මම පිළිතුරු දුනිමි.

කොහොමත් ඔහු සෙනසුරාදා වරුව වැඩ කර, නවාතැනට නොපැමිණ කෙළින්ම තම නිවස බලා පිටත් වන අතර සඳුදා දින නිවසේ සිටම වැඩට පැමිණ, හැන්දෑවට යළි නවාතැන වෙත පැමිණීම ඔහුගේ සාමාන්‍ය සිරිතයි.

'' අද නම් නමයවත් වෙයි ඔෆිස් එකට යනකොට... උඹ නැගිට්ටෙත් පරක්කු වෙලානෙ. ඉක්මන් කරලා යමං. පෙරේදා යන කොටත් ටිකක් පරක්කු වෙලා.. ''  මිතුරා කියවා ගෙන ගියේය.

'' අද ට‍්‍රැෆික් නෑනෙ.. විනාඩි 20න් ඔෆිස් එකට යතහැකි. යමු ද එහෙනම්. මං රෙඩි '' බෑගය ද කරට ගෙන ඔහු දෙස බලමින් මම පැවසුවෙමි.

'' ඒයි... උඹ අද ඔහොම ද යන්නෙ.. අද සෙනසුරාදා කැෂුවල්නෙ....''

මගේ මිතුරාට සෙනසුරාදා සහ සිකුරාදා පැටළිලාය. සෙනසුරාදා දිනයන්හි කැෂුවල් ඇඳුමින් වැඩට යාහැකි වුවත්, මගේ මිතුරා සතියේ දිනවල මෙන් අත්දිගට හැඳ, කමිසය ද කලිසමට යටකර සැරසිලාය.

නමුත් පුදුමයකි. මිතුරා පාලනය කරගත නොහැකි තරමේ සිනාවකය.

'' අනේ. උඹ වගේ ටියුබ් ලයිට් එකක්... බලපං අද දවස කවද්ද කියලා...''

ජංගම දුරකතනය ගෙන එහි තබූ  දින සටහන බැලීමි. අහෝ ! ඇණගැනිල්ලක මහත...! ඇණගෙන ඇත්තේ ඔහු නොව මාය.

උදෑසන සිට වූ සිදුවීම් පෙළ මට එකිනෙක සිහිපත් විය. සතියේ දිනවල මාර්ග තදබදයට හසු වන නිසා 6.30 ට එලාම් එක තබා වේලාසන අවදි වන නමුත් සෙනසුරාදා දිනයකැයි සිතා මා එදින එලාම් එක තැබූයේ 7.15 ටය. එමෙන්ම යහළුවාට ෂෝට් ලීව් එකක් ගැනීමට අවශ්‍ය යැයි පවසූ විට, මා 10.00ට විතර ගන්නැයි කීවේ ද සෙනසුරාදා වැඩ කිරීමට ඇත්තේ වරුවක් පමණක් බැවිනි.

හැඳසිටි ඩෙනිම් කලිසම සහ ටී ෂර්ට් එක සැණෙකින් ගලවා දමා, රාක්කයේ එල්ලා තිබූ අත්දිග කමිසයක් සහ කලිසමක් ගෙන ක්‍ෂණිකව අයර්න් කර ගතිමි.

'අහවල් එක' කැඩුණු කඩියෙකු මෙන් මා කඩිමුඩියේ ඇඳුම් ඇඟලා ගතිමි. මෙතරම් කෙටිවේලාවකින් මා කිසි දිනක ඇඳුම් ඇඟලාගෙන තිබුණේ නැත.

මේ ඇණගැනිල්ලේ ප‍්‍රතිඵලයක් ලෙස අප එදින කාර්යාලයට යන විට 9.00 ට ආසන්නව තිබුණි.

කෙසේ වුව ද එලෙසින් මා ඇණගත්ත ද, එදින මගේ වෙලාව නම් හොඳ බව කිව යුතුමය. මන්ද... යහළුවා නවාතැනේ නොසිටි දිනයක් වූයේ නම් එදින මා කැෂුවල් ඇඳුමින් වැඩට යනු නිසැකය. එසේ වූයේ නම් මහත් වූ අපහසුතාවකට පත්ව, නවාතැන වෙත ආපසු හැරී එනවා හැර වෙන විකල්පයක් මාහට ඉතිරි වන්නේ ද නැත. 

පාරිභෝගික සත්කාරයේ නොමැකෙන කතා

''Sainsbury's'' කියන්නෙ එක්සත් රාජධානියේ තියෙන විශාල සුපිරි වෙළඳසැල් ජාලයක්. එහේ තියෙන තුන්වෙනියට විශාලතම සුපිරි වෙළඳසැල් ජාලය තමයි මේක.

මේ සුපර් මාර්කට් එකකට ආපු වයස අවුරුදු තුනක කුඩා ළමයෙකුට විශාල ප‍්‍රහේලිකාවක් ඇතිවුණා ටයිගර් බ්‍රෙඩ් (Tiger Bread) නමින් අලෙවියට තබා තිබූ එක්තරා සේන්ස්බෙරි පාන් වර්ගයක් නිසා. ඇයට පෙනුනු විදිහට කොටියෙක්ගෙ කිසිදු ශරීර කොටසකට මේ පාන් වර්ගය සමාන වුණේ නෑ. නමුත් ඒ වෙනුවට ජිරාෆ් සතෙකුගේ හමේ ස්වරූපය නම් තිබුණා. 


ඇත්ත නේන්නම් ටයිගර් බ්‍රෙඩ් වුනාට කොටියෙක්ගෙ අහලමායිමකටවත් මේක කිට්ටු කරන්න බෑනෙ.....!

 


ඇය තමන්ගෙ අම්මගෙයි තාත්තගෙයි උදව්වත් අරන් සේන්ස්බෙරි පාරිභෝගික සේවා අංශයට මෙහෙම ලියුමක් ලිව්වා.

 

 

 

"ඇයි මේකට ටයිගර් බ්‍රෙඩ් කියන්නෙ. මේකට කියන්න ඕන ජිරාෆ් බ්‍රෙඩ් (Giraffe Bread) කියලනෙ..." ඇය මේ ලියුමෙන් එහෙම ඇහුවා.


මේ පුංචි ළමයා එවපු ලිපියට පිළිතුරු ලිපියක් ලියන්න සේන්ස්බෙරි පාරිභෝගික සේවා අංශය අමතක කළේ නැහැ. මොකද ලොකු පුංචිකම් උස් මිටිකම් පාරිභෝගික සත්කාරයට අදාළ නැති නිසා. ඒක නිසා ඇයට මේ සම්බන්ධයෙන් සෑහෙන්න ස්තුති කරලා තමයි මේ ලියුම ඇයට එවලා තිබුණෙ.

 

 

මේකෙ තවදුරටත් කියලා තිබුණා මේ පාන් වර්ගය ''ටයිගර් බ්‍රෙඩ්'' කියලා නම් වුණේ කොහොම ද කියලත්. මේක මුලින්ම හදපු පාන් බාසුන්නැහේ (baker) තමයි මේ නම දාලා තියෙන්නෙ. මොකද ඔහුට මේක කොටි හමක් වගේ තමයි පෙනිල තියෙන්නෙ. නමුත් ඒ නමට වඩා මේ පුංචි ළමයා යෝජනා කරන නම හොඳටම ගැළපෙනවා කියලත් මේ ලියුමෙ කියලා තිබුණා.


ඔවුන් ඒක ලියුමට  විතරක් සීමා කළේ නැහැ. එච්චර කාලයක් ටයිගර් බ්‍රෙඩ් නමින් තිබුණු නිෂ්පාදනය ''ජිරාෆ් බ්‍රෙඩ්'' කියලා ඔවුන් නම් කළා.


මේ නම් විපර්යාසය ගැන පාරිභෝගිකයන් දැනුවත් කරන්න වගේම අර පුංචි ළමයට ස්තුති කරන්න ජිරාෆ් බ්‍රෙඩ් කවුන්ටරයෙ මේ වගේ සටහනක් ප‍්‍රදර්ශනය කරන්නත් ඔවුන් අමතක කළේ නෑ.

 

 

"අපේ පාරිභෝගියෙක්ගෙ නුවණක්කාර යෝජනාවක් නිසා 'ටයිගර් බ්‍රෙඩ්' 'ජිරාෆ් බ්‍රෙඩ්' වශයෙන් නම වෙනස් කළත්, ආහාර සැකසුම් වට්ටෝරුවේ (recipe) කිසිම වෙනසක් අපි කරලා නැහැ. ඔබ මෙතෙක් රසවිඳි අපූරු රසය එලෙසින්ම එහි ගැබ්ව තිබෙනවා" කියලා තමයි ඒ සටහනෙහි දක්වලා තිබුණේ.


ආයතනයක දියුණුවට එවන පාරිභෝගික යෝජනා හෝ චෝදනා නිකන්ම කුණු කූඩෙට දාන්න එපා කියන්නෙ ඒකයි. ඒවයින් ගතයුතු දේ මොකද්ද කියල බලන්න  ඕන. පුංචි ළමයෙක්ගෙ කියා මොවුන් මේක නිකන්ම නොසළකා හැරිය නම් මේ අපූරු කතාව ලෝකෙ පුරා ප‍්‍රසිද්ධ වෙන්නෙත් නෑ. මම වුනත් අද මේ ගැන ලියන්නෙ නෑනෙ. පාරිභෝගික සත්කාරය නිසා නොමිලේ ලැබෙන ප‍්‍රචාරය තමයි මේවා.

Friday, September 26, 2014

Star United Supermarket Chain - ශ‍්‍රී ලාංකීය සුපිරි වෙළඳසැල් ක්‍ෂේත‍්‍රයේ නවතම ආගමනය

මේ බ්ලොග් අඩවිය වෙළඳනාම ප‍්‍රවර්ධනය කිරීමේ අරමුණින් හදපු එකක් නොවුනත් ස්ටාර් යුනයිටඩ් ගැන මගේ මුල්ම ලිපියෙ වචනයක් දෙකක් සඳහන් වී තිබීමත් සමග කිහිප දෙනකුම ඒ ගැන මගෙන් විමසීමක් කරපු නිසයි ඒ ගැන ලිපියක් ලියන්න හිතුවේ.

පසුබිම් කතාව

ඇත්තටම ලංකාවේ සිල්ලර වෙළඳ ක්‍ෂේත‍්‍රය අතිශය තරගකාරී එකක් කියන එක හැමෝම පිළිගන්නවනේ. මේ සිල්ලර වෙළඳ ක්‍ෂේත‍්‍රය තුළට තමයි පුංචි සිල්ලර කඩේ ඉඳන් මහාපරිමාණ සුපිරි වෙළඳසැලුත් අයිති වෙන්නෙ. ක‍්‍රමයෙන් ගම් දනව් නාගරීකරණය වෙනකොට, මිනිස්සුන්ගෙ ජීවන තත්වය උසස් වෙනකොට ඒ සමග පුළුල් වන පාරිභෝගික වුවමනාවන් ඉෂ්ට කරන්න සුපිරි වෙළඳසැල්වල අවශ්‍යතාව මතු වෙනවා. සාමාන්‍ය සිල්ලර කඩේකට ගිහින්, පෝලිමේ ඉඳන් එකින් එක අවශ්‍ය දේ කියලා මිලදී ගන්නවට වැඩිය මිනිස්සු කැමතියි සුපිරි වෙළඳසැලකට ගිහින් තමන්ට අවශ්‍ය භාණ්ඩ ටික නිදහසේ අරගන්න.

මේ සුපිරි වෙළඳසැල් කෙරුවාවට අපි කියන්නෙ Modern Trade එහෙමත් නැත්නම් නවීන වෙළඳාම කියලා. සුපිරි වෙළඳසැල්වලට පරිබාහිරව තියෙන අනෙකුත් සිල්ලර වෙළඳ ව්‍යාපාරවලට අපි කියන්නෙ General Trade එහෙම නැත්නම් සාමාන්‍ය වෙළඳාම කියලා. හැබැයි ලංකාවේ සිල්ලර වෙළඳ ක්‍ෂේත‍්‍රයෙන් 85% ක් විතර ආවරණය වෙන්නෙ මේ සාමාන්‍ය සිල්ලර වෙළඳසැල්වලින්.එහෙම වුනත් නවීන වෙළඳාමට එහෙමත් නැත්නම් සුපිරි වෙළඳසැල්වලට හිමි වපසරිය වසරින් වසර වැඩිවෙමින් පවතිනවා.

Cargills, Sathosa, Keels, Laughs, Arpico වැනි තරගකරුවන් කිහිප දෙනකු අතේ තමයි ශ‍්‍රී ලංකාවේ සුපිරි වෙළඳසැල් ක්‍ෂේත‍්‍රයේ පාලනය තියෙන්නෙ. ඉතින් මොවුන් අනුගමනය කරන ප‍්‍රමිතීන් නිසා වගේම ඔවුන්ගේ වෙළඳනාමය හා බැඳුණු ජනප‍්‍රියත්වය නිසා පාරිභෝගිකයන් වැඩි වශයෙන් ඔවුන් වෙත ආකර්ෂණය වෙනවා. මේ හරහා ඔවුන් විශාල ආදායමක් ලබනවා විතරක් නෙමෙයි අලුතින් නව ශාඛා විවෘත කරන්නත් කටයුතු කරනවා. මොවුන්ට තියෙන ප‍්‍රධානම ශක්තිය තමයි වෙළඳනාමයේ ජනප‍්‍රියත්වය (Brand Popularity). එමනිසා මොවුන් ලංකාවේ පේදුරුතුඩුවේ ඉඳන් දෙවුන්දර තුඩුව දක්වා මොන අස්සක මුල්ලක ශාඛාවක් දැම්මත්, මිනිස්සුන්ට ඒක අමුතුවෙන් හඳුන්වලා දෙන්න අවශ්‍ය නෑ. මිනිස්සු ඒකට ඉබේම ඇදිලා එනවා. මේකෙන් ඒ අවට තියෙන පුංචි පුංචි සිල්ලර කඩවලට ලොකු පහරක් වදිනවා. හැබැයි පුළුල් වන පාරිභෝගික අවශ්‍යතා ඉටු කරන්න සුපිරි වෙළඳසැල් නැතුවත් බෑ.

අපි මෙතෙක් කතා කළේ නවීන වෙළඳාමට අයත් කාගිල්ස්, කීල්ස් වැනි සමාගම් වශයෙන් ක‍්‍රියාත්මක මහාපරිමාණ තරගකරුවන් ගැන පමණයි. හැබැයි නවීන වෙළඳාම ඇතුළෙ ඉන්නෙ ඔවුන් පමණක් නෙමෙයි. තනි තනි පුද්ගලයන්ට අයිති ස්වාධීන සුපිරි වෙළඳසැලුත් තිබෙනවා. හැබැයි අර මහාපරිමාණ සුපිරි වෙළඳසැල් ජාල මේ ස්වාධීන සුපිරි වෙළඳසැල් පිහිටි ප‍්‍රදේශයට ආවම, ඔවුන්ටත් විශාල පසුබෑමකට ලක් වෙන්න සිද්ද වෙනවා. මේ සඳහා බලපාන ප‍්‍රධාන හේතු කිහිපයක් තිබෙනවා.


  • ඔවුන්ගේ වෙළඳනාමයේ ජනප‍්‍රියත්වය අඩු වීම
  • නවීන වෙළඳාම සම්බන්ධයෙන් දැනුම අඩු වීම
  • මහාපරිමාණ තරගකරුවන් ජනමාධ්‍ය කේන්ද‍්‍ර කරගත් ජාතික ම්ටටමේ අලෙවි ප‍්‍රවර්ධන වැඩසටහන් සිදු කළත්, මොවුන්ට එසේ කිරීමට ශක්තියක් නොමැති වීම
  • නවීන වෙළඳාම සම්බන්ධයෙන් ක්‍ෂේත‍්‍රයේ සිටින ප‍්‍රවීණයන්ගේ දැනුම හා උපදෙස් ලබා ගැනීමට අවස්ථාවක් නොලැබීම

ඔබ අහලා ඇති ලංකාවේ තිබිච්ච Sentra, Kings, Park & Shop, Dhanasiri, Dahamco වගේ ස්වාධීන සුපිරි වෙළඳසැල්. ඒව අද දකින්නවත් නෑ. ඔවුන්ට ඒවා වහන්න සිද්ද වුණේ අර මුලින් කියපු කුමන හෝ හේතුවක් නිසා. ඔවුන්ට මහාපරිමාණ තරගකරුවන් එක්ක හැප්පෙන්න බැරි වුණා. මොවුන් අද වෙනකොට දකින්න නැතත් අදටත් ලංකාවේ තනි තනි පුද්ගලයන්ට අයිති සුපිරි වෙළඳසැල් බවට පරිවර්තනය කළ හැකි ප‍්‍රමාණයේ සිල්ලර වෙළඳසැල් වගේම දැනටමත් සුපිරි වෙළඳසැල් වශයෙන් පවත්වා ගෙන යන වෙළඳ ස්ථාන විශාල ප‍්‍රමාණයක් තිබෙනවා. 

විසඳුම
උසස් වන පාරිභෝගික අවශ්‍යතාව සපුරනවා වගේම මහාපරිමාණ සුපිරි වෙළඳසැල් ජාල පැමිණියත්, නොසැළී ඔළුව උස්සන්න පුලුවන් අවස්ථාවක් ගමේ නැත්නම් නගරයේ තමන්ගෙම කියා වෙළඳසැලක් පවත්වා ගෙන යන මනුස්සයටත් තියෙන්න ඕන. මේ අවශ්‍යතාව සපුරන්න තමයි සිලෝන් බිස්කට්ස් සමාගම (CBL) ස්ටාර් යුනයිටඩ් (Star United) කියන වෙළඳනාමය ගොඩනගන්නෙ.

Star United Logo
මේක වෙළඳසැල් හිමිකාරීත්වයේ ගෞරවය සහ අභිමානය සුරකින ව්‍යාපාරික ආකෘතියක්...... 

CBL ආයතනය ගොඩනගපු මේ Star United නමැති සෙවන යටට එන්න මේ වන විට ස්වාධීනව පවත්වාගෙන යන සුපිරි වෙළඳසැල්වලටත්, සුපිරි වෙළඳසැල් බවට පරිවර්තනය කළ හැකි මට්ටමේ ඉඩපහසුකම් තියෙන සිල්ලර වෙළඳසැල්වලට පමණක් නෙමෙයි සුපිරි වෙළඳසැලක් අලුතින්ම විවෘත කිරීමට බලා පොරොත්තු වන අයටත් අවස්ථාව උදා කර දීලා තියෙනවා.

ස්ටාර් යුනයිටඩ් වෙතින් ලැබෙන සේවා

වෙළඳසැලේ බිම් සැලැස්ම (Layout) සකස් කර දීමේ ඉඳන් කැටගරි සැලැස්ම සකස් කරදීම, මෙහෙයුම් පුහුණුව ලබා දීම, තොරතුරු තාක්‍ෂණික සහය ලබා දීම සහ අලෙවි සේවා සහය ලබා දීම වගේ පුළුල් පැකේජයක් මෙම ස්ටාර් යුනයිටඩ් වෙළඳනාමය වටා එකතු වන අයට ලැබෙනවා. මේ සියලු සහය ලබා දුන්නත් වෙළඳසැලේ අයිතිය තියෙන්නෙ අදාළ වෙළඳසැලේ හිමිකරුටම නිසා වෙළඳසැලේ කරන සියලුම ප‍්‍රතිසංස්කරණ කටයුතු වගේම සවිකළ යුතු උපකරණ සියල්ල සඳහා සම්පූර්ණ බරපැන දැරිය යුත්තෙ අදාළ වෙළඳසැල විසින්මයි. මේ මොනවා ලැබුනත් අදාළ වෙළඳසැලේ හිමිකරුගේ කැපවීම නම් අනිවාර්යෙන් තියෙන්න  ඕන. මේ සඳහා CBL එක කරන ආයෝජනය සහ කැපවීම වෙනුවෙන් යම් ගාස්තුවක් අදාළ සුපිරි වෙළඳසැල විසින් ගෙවිය යුතු වෙනවා.  

මේ වන විට ස්ටාර් යුනයිටඩ් සුපිරි වෙළඳසැල් ජාලයේ ප‍්‍රගතිය

මේ වන විට මේ ස්ටාර් යුනයිටඩ් සුපිරි වෙළඳසැල් ජාලය සතුව වෙළඳසැල් 40කට අධික ප‍්‍රමාණයක් තිබෙනවා.

නුවර සහ මාතලේ පැත්තෙන් කටුගස්තොට, බරිගම, නුවර කොළඹ වීදිය, නාලන්දා (නාවුල), දිගන, මැණික්හින්න වගේ ප‍්‍රදේශවලත්..... උතුරුමැදින් පොලොන්නරුව, ජයන්ති පුර වගේ ප‍්‍රදේශවලත්... ගම්පහින් නිට්ටඹුව, වේයන්ගොඩ, යක්කල වගේ ප‍්‍රදේශවලත්.... කුරුණෑගලින් හතරලියද්ද, පිලැස්ස, දම්බොක්ක වගේ ප‍්‍රදේශවලත්..... රත්නපුර පැත්තෙන් මලව, කුරුවිට, කහවත්ත වගේ ප‍්‍රදේශවලත්..... දකුණුලකින් හුංගම, අගුණකොළපැළැස්ස වගේ ප‍්‍රදේශවලත් ස්ටාර් යුනයිටඩ් සුපිරි වෙළඳසැල් පිහිටලා තියෙනවා.

මේ වෙළඳ ආකෘතියේ විශේෂත්වය

මෙහි තියෙන විශේෂත්වය තමයි මේ හැම එකක්ම ඒ ඒ ප‍්‍රදේශයේම හිමිකරුවන්ට අයිති ඒවා වීම. එමනිසා ස්ටාර් යුනයිටඩ් වෙළඳනාමය යටතේ ව්‍යාපාරය කරගෙන ගියත්, මෙහි නාම පුවරුවේ එහි හිමිකරුගේ නම ද ඇතුළත් කිරීමට අමතක කර නැහැ. වෙළඳසැල් හිමිකාරීත්වයේ ගෞරවය සහ අභිමානය සුරකින ව්‍යාපාරික ආකෘතියක් කියලා මම මුලින් සඳහන් කළේ ඒකයි. 


Star United- Dambulla
 මෙහි ඉහළින්ම තියෙන්නෙ අදාළ සුපිරි වෙළඳසැලේ හිමිකරුගේ නමයි.

එසේම මේ සුපිරි වෙළඳසැල්වල අලෙවි කරන්නෙ CBL නිෂ්පාදන විතරක් නෙමෙයි. රටේ ජනප‍්‍රිය සෑම නිෂ්පාදකයෙකුටම තම නිෂ්පාදන අලෙවි කර ගැනීමේ සමාන අවස්ථා මෙහි උදා කර දී තිබෙනවා. මොකද.... තියෙන දේ වෙනුවට තම රුචිකත්වයට අනුව අවශ්‍ය දේ තෝරා ගැනීමේ පහසුකම පාරිභෝගිකයට අනිවාර්යෙන් තිබිය යුතු නිසා. හැබැයි ඇතැම් ජනප‍්‍රිය සුපිරි වෙළඳසැල් තුළ නම් මේ කියූ දේ වෙනව ද කියන එක ගැටලුවක්.

ඇත්තටම මේක හොඳ අරමුණු රැසක් පෙරදැරි කරගෙන ආරම්භ කරපු ව්‍යාපෘතියක්... මෙය ආරම්භ කරල තවම ගත වෙලා තියෙන්නෙ කෙටිකාලයයි. මෙය නවෝත්පාදනයක් වගේම දැඩි අභියෝගාත්මක ගමනක්. කොහොම වුනත් ඉදිරියේදී මේක ජනප‍්‍රිය ජාලයක් ලෙස පාරිභෝගිකයන්ට, සැපයුම්කරුවන්ට වගේම ස්ටාර් යුනයිටඩ් සමග අත්වැල් බැඳන් ඉන්න හවුල්කරුවන්ට මහගු ප‍්‍රතිලාභ ගෙන දේවි කියන විශ්වාසය සහ බලාපොරොත්තුව මේ ව්‍යාපෘතියේ ආරම්භකයන් සතුව තිබෙනවා. 

http://www.dailynews.lk/?q=business/cbl-expand-star-united-supermarket-chain-500

 වැඩි විස්තර කියවන්න මේ උඩ තියෙන ලින්කුව යොදාගන්න.

 


Star United supermarkets- the latest supermarket chain in Sri Lanka By Damayantha Munasingha

Friday, September 19, 2014

පොලොන්නරුවෙදි උගුඩුවෙක් දුන්න සැපක්......................

රැකියා ස්ථානයෙන් පවරපු රාජකාරියකට පහුගිය සතියෙ ජයන්තිපුරට යන්න වුනා. ජයන්තිපුර කිව්වට ඒක කොහේ තියෙනව ද කියල ඇතැමෙක් දන්නෙ නැති වෙන්නත් පුලුවන් නිසාම, පොඩි සිතියම් පොජ්ජකුත් මේකට ඇමුණුවා



පවරපු රාජකාරිය ඉෂ්ට කරන්න මාත් එක්ක තව දෙන්නෙකුත් කොළඹින් ගියා. රාජකාරියට අදාළ සියලු වැඩකටයුතු ඉවර වෙනකොට, ඉර බහින්නත් ඔන්න මෙන්න. අපිට එදාම ආපහු කොළඹ එන්න බස් තිබුනත්, කොළඹ ඉඳන් අපේ වාසස්ථානවලට යන්න බස් තියේ ද කියන දෙගිඩියාව අපිට තිබුනා. 

 

ඒක නිසා අපි එදා හැන්දෑවෙම කොළඹ එන්නැතුව, පොලොන්නරුව ටවුන් එකට යන්න තීරණය කළා. ඔය ලෝක ප්‍රසිද්ධ ගල් විහාරය එහෙම තියෙන්නෙ ජයන්තිපුරයි පොලොන්නරුවයි අතර තමා. අපේ පැරැන්නන්ගේ ශෛල නිර්මාණ හැකියාව කොයි තරම් විශිෂ්ට ද කියලා ගල් විහාරෙට ගියාම හිතෙනවා. සරළව කියනව නම් පිස්සු හැදෙනවා. බුද්ධාලම්බන ප‍්‍රීතිය ටිකක් එන්නත් එක්කම ගල්විහාරෙ තියෙන සැතපෙන පිළිම වහන්සෙගෙ පින්තූරෙකුත් මේකට ඇමුණුවා.


ජයන්තිපුර ඉඳන් පොලොන්නරුවට බස් එකේ යනව නම් රුපියල් 20ක් වගේ තමයි ගන්නෙ. පොලොන්නරුව පැත්තට බඩගාන්න හිතුවේ ඇයි කියනව නම් අපේ පරණ මිත්‍රයෙක්ගෙ ගෙදර තිබුනේ පොලොන්නරුව ඔරලෝසු කණුව කිට්ටුවම. පොලොන්නරුව කිට්ටුවටම ආපු එකේ ඔහුත්  ටිකක් හම්බවෙලා නොගියොත් ඒකත් අවුල් නෙ. 

 

ඒ වෙනකොට අපේ රටේ සමහර ප්‍රදේශවලට බලපාලා තිබිච්ච නියඟෙ පොලොන්නරුවටත් එලෙසමයි. ඉරට 'වියාපු පොල් අතු කෑල්ලක් ගහන්න හිතෙන' රස්නයක්. 

 

තිබහටයි මහන්සියටයි දෙකටම හරියන්න කූල් ෆ්රුට් ජූස් මොනවහරි බොමු කියලා අදහසක් ආවා. ඉතින් ඔරලෝසු කණුව ළගම තිබුණු  සුපර් මාකට් එකට තුන්දෙනාම ගියා. ඇතුළතත් පිරිසිදුයි. පාරිභෝගික සේවාවෙත් කියන්න තරම් වරදක් නෑ. ඒ කියන්නෙ හොඳයි කියන එකනෙ. සුපර් මාකට් එකේ නම තමයි ''ස්ටාර් යුනයිටඩ් ක‍්‍රවුන් ෆැමිලි සුපර්'' 

 

පොලොන්නරුව ඔරලෝසු කණුව ළගම තියෙන ස්ටාර් යුනයිටඩ් සුපර්මාර්කට් එක තමයි මේ.

 

 

ඕක තමයි කතාව. කියෙව්වට බොහොම ස්තුතියි !

 

හෝව්... හෝව්.... කතාව ඉවර නෑමෙච්චර වෙලා කළේ කතාවෙ පූර්විකාව. ඕං... දැන් තමයි කතාව පටන් ගන්නෙ. 

 

අපි එදා රෑ නැවතුනේ පොලොන්නරුව හන්දියට ටිකක් ළගම නවාතැන්පොළක (Guest House). වොෂ් එකකුත් දාගෙන, කෑමත් ගෙන්න ගෙන කාලා, පොඩි කයියකුත් ගහලා ඉවර වෙනකොට රෑ 10.30ට ඇති. 

 

තිබිච්ච මහන්සියටත් එක්ක යකා ගැහුව වගේ නින්ද ගියා. මොකද...ඒක අපිටම කියාපු රාත‍්‍රියක්. සීතලයි -නිහඬතාවයි- නිදිමතයි මේ තුනම එකට එකතු වුණාම ඉතින් කුමන කතා ද?

 

ඒත් කරුමයක මහත! 

 

එකපාරටම අපි උඩගිහින් ඇහැරුනා. කවුදෝ වහළෙට ගල් ගහනවා. වෙලාව පාන්දර 4.00 පහුවුණා විතරයි. ඒකත් අමුතුම තාලෙ ගල් ගැහිල්ලක්. ගලක් වහළ උඩට විසිකරනවා... ඒක පෙරළිලා පහළට එනවා. ආපහු ඒ ගලම වහළ උඩට දානවා. ඒක ආයිත් පහළට පෙරළිලා එනවා. ඔහොම මේක දිගටම වෙනවා. නින්ද යන්නෙත් නෑ. දැන් අපි තුන් දෙනාම ඇහැරිලා. හිතට පොඩි දෙගිඩියාවකුත් ආවා හොල්මනක්වත් ද කියලා. නැගිටින්නත් කම්මැලියි. විනාඩියක් දෙකක් බැලුවා. නවතින පාටක් නෑ. නැගිට්ටා තුන් දෙනාම... දන්නැද්ද ඉතින් හොඳ පදේකුත් කියාගෙන. 

 

සද්දෙ එන්නෙ අපේ කාමරේ වොෂ් රූම් එක පැත්තෙන්. දොර ඇරලා බැලින්නම් සද්දෙ එන්නෙ වොෂ් රූම් එකේ සිවිලිම උඩින්. උගුඩුවෙක් සිවිලිම උඩ ඉඳන් ආතල් එකක් ගන්නවා. මේ ඇස්බැස්ටෝස් සිවිලිම ගහල තිබුණෙත් මුදුන් වහලෙ ඉඳන් දෙපැත්තට බෑවුම් වෙන විදිහට. උඩ පැනලා සිවිලිමට හයියෙන් තට්ටුවක් දැම්මා, මූ එළියට යයි කියලා හිතාගෙන.  

 

වැඩේ දෙල් වුණානෙ! සිවිලිමෙන් එළියට යනවා වෙනුවට මූ නැග්ගෙ නැතෑ සිවිලිමේ ඉහළ කොටසට. දැන් මූ ඉන්නෙ හරියටම අපේ ඇඳන්වලට හරිකෙළින් සිවිලිම උඩ. මූ විතරක් ආව නම් කමක් නෑ. බල්ලො මස් කඳුලක් නැති ඇටකටුව කටින් අතාරින්නෑ වගේ මූත් අර ගල් ගෙඩියත් අරන් තමයි උඩට ඇවිත් තිබුණෙ. දැන් ආයිත් අර සෙල්ලමමයි. දැන් තිබුණට වැඩිය සද්දෙත් වැඩියි. සිවිලිමත් උස වැඩියි. ආයෙ ඉතින් කොහෙ එළවන්න ද......

 

මූ මේ සෙල්ලම නතර කළේ හරියටම උදේ 6.00ට කිට්ටු කරලා. එතකම් ඉතින් ''අපි නිදිමරන්නම්... උඹ ආතල් ගනින්..'' කියලා අපි ඇහැරන් හිටියා. උගේ කරදරය නතර වුනාට පස්සේ තමයි ඕන් ඉතින් අපිට නින්ද ගියේ. 

 

උදේ 6.00ට නැගිටින්න හිතන් තියපු එලාම් එකත් ඕෆ් කරලා හොඳට පොරවගෙන නිදා ගත්තා. නැගිටින කොට උදේ 8.20 විතර වෙලා. එදා නම් උගුඩුවා ගැන පුදුම තරහක් තිබුනේ. ඒත් මේක ලියන කොට ඌ ගැන සතුටක් එන්නෙ. ඒ සමහර විට අපිට පොලොන්නරුව ගැන නොමැකෙන මතකයක් ඌ දුන්න නිසා වෙන්න ඇති.