කිසිදු මිනිස් වාසයක් නැති, අලි ගහණ කැලෑ මායිමේ කුඹුරු කෙරුවාව 2

අලි මදිවට හරක්...

බටහිර අහසින් හිරු බැස ගොස් දැන් පැයකටත් වැඩිය. හවස් වරුවේ ඉර පායා තිබූ පැය කිහිපය හැරුණු කොට, මුළු දවස පුරාම පැවතියේ මහ වැස්සකට සැරසුණු බීරම් අහසකි. නමුත්, ඉදහිට සුළඟට ගසාගෙන විත් මහපොළොව සිපගන්නා ඉතා තුනී හිරි පොදයක් හැරෙන්නට මහා වරුසාවක් නම් අද වැස්සේ නැත. 

අතරින් පතර ශේෂ වී ඇති කොහොඹ ගස්, පලුගස් හා ආර අද්දර එක යායට වැවී ඇති හම්බු ගස් මණ්ඩිය අපිළිවෙළට පද්දමින් දවස පුරා හමා ආ සැඩ සුළං පහර තවමත් නොකඩවා ගමනේය. උදෑසන සිටම වහින්නට පෙරමං හැදූ මහා කළුවළා කැටි  තුනී කරමින් වැස්ස වළකාලූයේ දවස පුරා හැමූ මේ සුළං පහරය.  

ඉර මුදුන් මද්දහන් යාමයේ හිරු වළා අතර සැඟව තිබුනෙන්, ඊයේ පැවතියාක් වැනි කම්මුල් පුපුරු ගහනා ගිනිපූටක අව්වක් අද තිබුණේ නැත. අත්හැර දමන ලද අසල්වැසි ඉඩමක පොල් ගසකට ඊයේ දිනයේ මද්දහන් යාමයේ නැග කඩා ගත් වෑවර ගෙඩි කිහිපය නොවෙන්නට ඊයේ දිනය බොහෝ දුෂ්කර වන්නට ඉඩ තිබුණි. ගිනි අව්වට පිච්චෙමින් නොසෑහෙන්න ගත වෙහෙසන විට දැනෙන තෙහෙට්ටුව සහ තිබහ වචනයෙන් කිව නොහැකි තරම්ය. කුසට අහරක් සේම රසවත් පානයක් ද වන වෑවර ගෙඩියක් යනු එවැනි වෙලාවට අමෘතය වන් දෙයකි. 

ආර අද්දර හම්බු යාය පිස හමාගෙන එන සිහිල් සුළං පහර ඇඟේ රෝම කූප උලුප්පන සුළුය. අද දවසට වැඩ කටයුතු හමාර කර, දිය නාගෙන දැන් පැයකට ආසන්න නමුත්, හිසකේ තවමත් තෙතබරය. සිහිල් සුළං පහර හිසකේ අතර දැවටී හමා ගෙන යන විට දැනෙන්නේ පුදුමුකාර සනීපයකි. 

ගොම්මන් වැටෙන්නට මත්තෙන් කල් වේලා ඇතිව ඇලට ගොස්, දිය නා ගෙන පැල වෙත සේන්දු වීම ගොවියන්ගේ සිරිතය. එසේ නොකර, අලි-විසකුරු සර්පයන් එළි බහින ගොම්මන් යාමයේ දිය නෑමට ඇළ වෙත යාම එතරම් නුවණට හුරු කාරියක් නොවේ.  

මෙහි සිට මීටර් 300ක් පමණ එපිටින් ඇති උස් වැවේ සිට ජලය පහසුවෙන් වගා බිම් වෙත හැරවීම සඳහා කොන්ක්‍රීට් ඇළ මාර්ග සකස් කර ඇත. පළලින් අඩි දෙකහමාරකට නොවැඩි වුව ද, රැළි නංවමින් ගලා යන වේගවත් දියපහර නිසා මෙහි දිය නා ගැනීම කෙනෙකුට අපහසු කාර්යයක් නොවේ. මේ සියල්ල වළව වම් ඉවුර නව සංවර්ධන යෝජනා ක්‍රමය යටතේ ඉදිකෙරුණු ඒවාය.   

බිම් පැලේ කණුවක එල්ලා ඇති භූමිතෙල් ලාම්පුව, භූමි තෙල් උරා බොමින් කහවන් දැල්ල සුළඟේ තාලෙට නටවමින් ඔහේ දැල්වෙයි.

තවමත් බත ලිපේය. දහවල දෙසා බෑ ටින් මාලු බැදුම හා කැරන් කොපු ව්‍යංජනය  සහිත බත් පංගු දෙක මුළුමණින්ම පාහේ ඇඟට උරාගෙන ඇති සේය. 

ඇඟපත නොවෙහෙසා සිටිනා විට මෙන් නොව, නොසෑහෙන්න ඇඟපත වෙහෙසන විට කොතරම් කුසට අහර දැම්ම ද, ඒවා මද වේලාවකින් කිසිත් නොකෑ ගාණට සිඳී යයි. එය හොඳින් රත් වූ ඇලුමීනියම් තැටියක් මතට ජල බින්දු කිහිපයක් දැමූ විට වහා සිඳී යන්නාක් මෙනි.

අද දවස පුරා කළේ කම්බි වැට සකස් කරන එකය. වැව් තාවුල්ලේ සහ අත් හැර ඇති කෘෂි ඉඩම්වල යහමින් තණකොළ වැවී ඇති නිසා මී හරකුන් සහ එළ හරකුන් සිය ගණනක් මේ යායට ඇතුල් කර ඇති පදමින් තණ කැවීමට එඬේරෝ කටයුතු කරති. මෙවැනි හරක් රංචුවක් තවමත් ළපටි ගොයම ඇති මේ කෙත් යායට වැදුනොත් වෙන්නේ මහා පාඩුවකි. උන්ගෙන් මේ කෙත පරිස්සම් කර ගැනීම කළ යුතුම කාරියකි. අලින්ට නම් මේ වැටවල්වලින් පලක් නැත. උන්ට මේවා නූල් පොටවල් වැනිය. 

රාත්‍රී ආහාරයට පිසෙන හාල්මැස්සන් බැදුමෙන් හා කරවල දමා හැදූ ළපටි වම්බටු හොද්දෙන් එන සුවඳ නාස් පුඩු අතරින් ඇතුළුව රසනහර පුබුදමින් ගත පුරා දිව යයි. උදේට රජෙකු මෙන් ද, දවල්ට රාජකුමාරයෙකු මෙන් ද, රාත්‍රියට හිඟන්නෙකු මෙන් ද ආහාර ගත යුතු යැයි කියන උපදෙස් දවස පුරා හෙණ්ඩත් වෙන ශරීරවලට කොහෙත්ම වලංගු නැත. 

හිත සේම කුස පිරෙන්නට රාත්‍රී අහර ගෙන, පලුගස උඩ සකසා ඇති උඩු පැලට ගිය විට වේලාව ගත වෙන්නේ තප්පරය පවා විනාඩියක් පමණ ගිමන් හරින ගාණටය. ඒ කාලය මිඩංගු කරන්නට කියාපු රූපවාහිනි වැනි තාක්ෂණික උපකරණ මෙහි නැති නිසා විය යුතුය.

 

ඉඳහිට උඩුබුරුලන හිවලුන්ගේ හූ හඬ හා එක ගොන්නට ඇසෙන ඇටිකිත්තන්-බිම් ඌරන් වැනි කෘමීන්ගේ හඬ හැරුණු විට, හරිම නිසොල්මන් වූ මේ රාත්‍රිය මෙසේ නින්දත් නොනිත්දත් අතර ගෙවෙනු ඇත. 

පහතින් මෙහි ඉතිරි ලිපිත් කියවන්න.

මිනිස් වාසයක් නැති, අලි ගහණ කැලෑ මායිමේ කුඹුරු කෙරුවාව 1 (පලු ගසේ පැල මත රැයක්....)

මිනිස් වාසයක් නැති, අලි ගහණ කැලෑ මායිමේ කුඹුරු කෙරුවාව 2 (අලි මදිවට හරක්...)

මිනිස් වාසයක් නැති, අලි ගහණ කැලෑ මායිමේ කුඹුරු කෙරුවාව- 3 (අලින්ට වැට...)

මිනිස් වාසයක් නැති අලි ගණ කැලෑ මායිමේ කුඹුරු කෙරුවාව 4 (මැදියම් රැයේ අලියෙකු සමග සටනක්.....)

අලි ගහණ කැලෑ මායිමේ කුඹුරු කෙරුවාව 5 (යමින් ගමන් කැලෑ ගෙඩි කමු...)

කිසිදු මිනිස් වාසයක් නැති, අලි ගහණ කැලෑ මායිමේ කුඹුරු කෙරුවාව- 6 (මිනිසුන්ගේ ධෛර්යය අලින්ටම යට වෙලා යයි ද?)

කිසිදු මිනිස් වාසයක් නැති, අලි ගහණ කැලෑ මායිමේ කුඹුරු කෙරුවාව - 7 (මානව ශිෂ්ටාචාරයේ පදනම් සාධකය ජලයයි.....)

කිසිදු මිනිස් වාසයක් නැති අලි ගහණ කැලෑ මායිමේ කුඹුරු කෙරුවාව- 8 (අලින්ගෙ හයියට යට මිනිස්සු විතරක් නෙමෙයි...)

කිසිදු මිනිස් වාසයක් නැති, අලි ගහණ කැලෑ මායිමේ කුඹුරු කෙරුවාව- 9 (මාස තුනක මහන්සියේ කූටප්‍රාප්තිය....)