කිසිදු මිනිස් වාසයක් නැති, අලි ගහණ කැලෑ මායිමේ කුඹුරු කෙරුවාව 1

පලු ගසේ පැල මත රැයක්....

හාත්පස ගනඳුර වෙළා ගෙන ඇත. කලු විසල් ඇතිලියක් හිසට ඉහළින් නැවූවාක් සේ දිස්වන මහා අහස්ගැබ, ලොකු කුඩා නෙක විසිතුරු විදුලි බුබුළුන් අලංකෘත වියනක් මෙනි. දිවා කල කිසිදු හාන්කවිසියක් නැතිව සීරුවට මුනිවත රැකි පළඟැටියන්, බිම් ඌරන් හා ඇටිකිත්තන් ඊට හිලව් වන්නට මෙන් මේ ගොම්මන් රැයේ අතොරක් නැති හඬලෑමේය. එය එකිනෙකා කල් ඇතුව කතා කරගෙන තරඟයට කරනා සංගීතමය වාදනයක් බඳුය. 

වෙනදා රෑ නවය-දහය වන තෙක්ම ඩක ඩකස් - ඩක ඩකස් හඬින් ගල් කුළුවලට වැරෙන් තඩි බානා ගල්කොරියේ ගල් කඩන යන්ත්‍රය අද වේලපහම නිහඬ කර ඇති සේය. මෙහි සිට කි.මී. 6ක් පමණ එපිටින් පිහිටි මේ ගල් කොරියේ ගල් කඩන හඬ දිවා කාලයට එතරම් නොඇසුන ද, රාත්‍රියට නම් ඉතා පැහැදිළිව ඇසේ.  

මාස පෝය දිනයක් වූ අද වැනි දිනක, අහස පුරා සියදහස් ගණනක් තරු පායා නොතිබෙන්නට මුළු අහසම එකම කලු කුහරයක් සේ දිස්වන්නට ඉඩ තිබුණි. 

නිහඬවම ඉතා ඉහළ අහසේ චන්ද්‍රිකාවක් ගමන් කරයි. පොල් අතු පැලේ වහළෙට වැසී නොපෙනී යන තෙක්ම මම ඒ දෙස බලා හුන්නෙමි. අහසේ එක මොහොතකට එය නිසල කර තැබිය හැකි නම්, කිසිදු ලෙසකින් හෝ අන් තරුවලින් එය වෙන් කර හඳුනා ගැනීමට කිසිවෙකුත් සමත් නොවන බව නිසැකය.

හම්බන්තොට තිස්සපුර ප්‍රදේශයෙහි අක්කර සිය ගණනක් පුරා විහිදි මේ කෘෂි බිමෙහි පලින් පල ඉතිරිව ඇති මහා පලුගස් හා කොහොඹ ගස් පිස වරින් වර හමා එන සුළඟින් උඩු පැල ලතාවට පැද්දෙයි. එය කිසිවෙකු විසින් මුළු පැළම තම දෝතට ගෙන, ලතාවට පද්දන්නාක් වැනිය. 

අක්කර හතර හමාරකින් යුත් මේ කුඹුරු යාය දිවා කල දකින්නෙකුට නම්, ඒසා විසාල එකකැයි කිසිවිටෙකත් නොසිතෙනු ඇත. මදක් ත්‍රිකෝණාකාර හැඩයක් ගත් මේ කුඹුරු බිම මධ්‍යයෙහි සාමාන්‍ය ප්‍රමාණයේ පලුගස් තුනකි. ඉන් එකක හොඳින් තෝරා ගත් අතු දෙබලක් මත සවිමත් ලෑලි අතුරා සකස් කළ පොල් අතු පැළකි. එම ගස පාමුලම ඉවුම් පිහුම් කිරීම සඳහා පොල් අතු සෙවිලි කර සැකසූ බිම් පැලකි. 

පලුගස උඩ සකසා ඇති උඩුපැල කෙනෙකුගේ සිත බැඳ ගන්නාසුළු හරි අපූරු නිමැවුමකි. කිසිදු අපහසුවකින් තොරව පස් දෙනෙකුට වැතිරිය හැකි ඉඩකින් යුත් මෙහි මදුරු දැල් දෙකක් සහ කොට්ට දෙකක් ද, මදක් දිරා ගිය පැදුරු කඩමාලු දෙකක් ද නිරතුරුව තබා ඇත. උඩුපැලට නැගීම සඳහා ගසටම ආඳා සැකසූ සවිමත් ලී ඉණිමගකි. 

මෙම බිමේ සිට හම්බන්තොට වරායට ඇත්තේ කි.මී 7කට නොවැඩි දුරකි. වරායේ ඇති දැවැන්ත විදුලි පහන්වල ආලෝකය අහස් කුසට වැදීමෙන් ඒ අහස් කුට්ටිය පමණක් වඩා ආලෝකමත්ව දිස්වෙයි. 

අලි ගහණ කැලයට මායිම්ව පිහිටි මේ ගොවිබිම් කරා දිනපතාම පාහේ රාත්‍රී කාලයට අලි කඩා වදිති. දෑතේ විරියෙන් දහදිය හෙළා කරන වගාවන් රැක ගන්නට රෑ පුරා මෙසේ පැල් රකින්නට ගොවියන්ට සිදු වේ. 

එපිට යායක් දෙසින් නොකඩවා කෙරෙන බල්ලන්ගේ බිරුම් හඬක් ඇසේ. නිසැකවම අලි එහි ඇති වගාවන්ට වැදීලා විය යුතුය. එය සැබෑය. බිමට වැටෙන පුළුන් රොදක හඬ පවා ඇසෙන සුළු මේ නිසොල්මන් රැය දෙවනත් කරමින් අලි වෙඩි හඩක් දෝංකාර දුන්නේය.

ඒ සමග, කි.මී දෙක තුනකට එපිට යායක පැල් රකින්නකු විසින් වරින් වර තම වගා බිම වෙත එල්ල කරනු ලබන අධිබලැති විදුලි ආලෝකය මේ පැල වෙත ද වරින් වර වදියි.  

මේ මැදියම් රැයේ මහා පාලුව අතරින් මාටින් වික්‍රමසිංහයන්ගේ ගම්පෙරළිය නවකතාව ඇසුරින් සකස් කළ ගම්පෙරළිය චිත්‍රපටයේ එන කොටසක් මට සිහිවෙයි. 

එය ජිනදාස විසින් බිබිලේ තමන් ගත කරන දුෂ්කර ජීවිතය ගැන නන්දාට එවූ ලිපියේ සඳහනකි.    

අපේ වාඩිය තියෙන්නෙ පාලුවට ගිය වැවක් අද්දර..හතර වටේම මහා මූකලන් කැලේ..

මෙහෙ හරිම පාලුයි..

දවල්ට හරියට පායනවා...පොළොවෙ අඩිය ගහන්න බෑ..

හැන්දෑවේ හය වුනාට පස්සෙ මිනිස් පුලුටක් දකින්න නෑ... දන්න හඳුනන කෙනෙක් මේ හතර මායිමකවත් නෑ..

මැදියම් රැයට තවත් ඇත්තේ අඩහෝරාවක් පමණය. මේ කෘෂිබිම් යාය අද කිසිදු මිනිස් පුලුටක් නැති පාලුවට ගිය බිමක් වුව ද, මීට වසරකට දෙකකට උඩදී බලන්නට ආස හිතෙන තරමේ එකම සරුසාර කෘෂි යායක්ව පැවතුණි. සෝවියට් රුසියානු කෙටිකතාවන්හි  අපූරුවට වණන සරුසාර සමූහ ගොවිපලක අසිරිය එකල මේ කෘෂිබිම් දුටු විට කෙනෙකුට සිහි වේ.  

මෙහි ගොවිතැන් කිරීමට එකල මිනිසුන්ට තිබූ උනන්දුව කෙමෙන් වියැකී ගියේ අන් කිසිවක් නිසා නොව දිනපතාම පාහේ විදුලි වැට පෙරළා ගෙන සරුසාර කෙසෙල් වතුවල-කුඹුරුවල සහ වෙනත් ගොඩ වගාවල රස විඳින්නට පැමිණෙන අලින් නිසාය. මේ පෙරේදා දිනයෙහි මේ කෙතට ද අලියෙකු වැදුණි.

ගොවිතැනයි ජීවිතයයි යනු දෙකක් නොව එකක් ලෙසට ඇට ලේ මස්වලට කැවුණු නිසාවෙන්දෝ මෙවර මේ යායටම කෙරෙන්නේ මේ කුඹුරු යාය පමණක්ය. 

බීජ, තෙල්, පෝර වැනි දේට වැය කරන්නා වූ මහා මුදල් කන්දරාව පරයන සුළු, තමන් විසින් ගිනි මද්දහනේ මහ පොළොවට මුසුකරන දහඩිය කඳුළුවලට නිසි ප්‍රතිඵල යථාකාලයේදී ලැබෙනු ඇත යන විසල් බලාපොරොත්තු හිත දරන් - ඒ මතින් ඉපිළෙන අවිනිශ්චිත බවේ සුසුම් පොද හිස් වාතලයට මුසු කරමින් ගොවියන් අලි වදින මේ බිමේ කෘෂිකර්මාන්තයේ නියැළෙති. 


පහතින් මෙහි ඉතිරි ලිපිත් කියවන්න.

මිනිස් වාසයක් නැති, අලි ගහණ කැලෑ මායිමේ කුඹුරු කෙරුවාව 1 (පලු ගසේ පැල මත රැයක්....)

මිනිස් වාසයක් නැති, අලි ගහණ කැලෑ මායිමේ කුඹුරු කෙරුවාව 2 (අලි මදිවට හරක්...)

මිනිස් වාසයක් නැති, අලි ගහණ කැලෑ මායිමේ කුඹුරු කෙරුවාව- 3 (අලින්ට වැට...)

මිනිස් වාසයක් නැති අලි ගණ කැලෑ මායිමේ කුඹුරු කෙරුවාව 4 (මැදියම් රැයේ අලියෙකු සමග සටනක්.....)

අලි ගහණ කැලෑ මායිමේ කුඹුරු කෙරුවාව 5 (යමින් ගමන් කැලෑ ගෙඩි කමු...)

කිසිදු මිනිස් වාසයක් නැති, අලි ගහණ කැලෑ මායිමේ කුඹුරු කෙරුවාව- 6 (මිනිසුන්ගේ ධෛර්යය අලින්ටම යට වෙලා යයි ද?)

කිසිදු මිනිස් වාසයක් නැති, අලි ගහණ කැලෑ මායිමේ කුඹුරු කෙරුවාව - 7 (මානව ශිෂ්ටාචාරයේ පදනම් සාධකය ජලයයි.....)

කිසිදු මිනිස් වාසයක් නැති අලි ගහණ කැලෑ මායිමේ කුඹුරු කෙරුවාව- 8 (අලින්ගෙ හයියට යට මිනිස්සු විතරක් නෙමෙයි...)

කිසිදු මිනිස් වාසයක් නැති, අලි ගහණ කැලෑ මායිමේ කුඹුරු කෙරුවාව- 9 (මාස තුනක මහන්සියේ කූටප්‍රාප්තිය....)