ඉඩෝරය

කොළොම්තොට මහවැස්ස.....

කිසිදු අරුතක් නැතිව...

පාරතොට යටවෙලා...

පයින්වත් යා නොහැක...

කොළොම්තොට එලෙස වුව...

අනෙක් පැති එලෙස නැත... 

අහස නිල්සයුර මෙනි..

සුදු වළා රැළි විසුළ...

වතුරපොදකුදු නැතිව..

මිය ඇදෙන තුරුලතා..

පණ අදින වගාබිම්...

නැගෙන ජන ළසෝහඬ... 

නොපෙනේ ද නොඇසේ ද..

 බලකාර දෙවිවරුනි...??

එකදු වරුසාවක් තබා වැහි වළාවක සේයාවකදු නැත. අහස් ගැබ, සුදු පැහැති රැළි කැටිති පිරි නිල් මහසයුර මෙනි. අතොරක් නැතිව දවස පුරා පතිත වන අව්රශ්මිය උහුළනු බැරි තරම්ය. පසුගිය සමයේ නිලට දිළුණු ගස්වල කොළ, දැන් සම්පූර්ණයෙන්ම වාගේ වියළී ගොසිනි. වරින් වර හමන සුළඟට ගස්වල ඇති වියළි කොළ ගැලවී මහපොළොව සිපගනියි. දුහුවිල්ල සමග දසත පැතිරෙන වියළි කොළ, වරින් වර බිම සහ අහස සිපගනිමින් නිරන්තර චලනයේ යෙදෙයි. උසට උසේ වැඩුණු පොල් ගස් ද බිමට නැමුණු අමු අතු සහිතව මළානිකව ඇත. ඇතැම්වා මිය ගොසිනි. දැඩි ඉඩෝරයන්ට පවා ඔරොත්තු දෙන සුළු මහා කොහොඹ ගස් ද මෙවර දැඩි නියංසායට හසුව ජීවිතයත් මරණයත් අතර සටනකය.

ප‍්‍රදේශයේ ගොඩමඩ වගාබිම් පෝෂණය කරමින් වෙනදා ගලාගිය ඇළදොළ ද දැන් නිසලය. ඇළෙහි තැන තැන වලගැසුණු තැන්වල පමණක් දිය ඉතිරිව ඇත. දිය පිරුණු කාලයෙහි මෙහි සිටි මත්ස්‍ය කැළ අද කොහිදැයි කිව නොහැක. මාළුන් අතලොස්සක් පමණක් ඇළෙහි දිය රැඳුණු තැන්වල දිවි රැක ගෙන සිටිති. නමුදු ඇළ කණ්ඩියේ ගසක අත්තකට වී මාළුන් ඩැහැ ගැනීමට මාන බලනා පිළිහුඩුවන් ද, දියකඩිත්තෙහි මඳක් ඉහළට එසවුණු ගලක් මත නිසොල්මන්ව දෑස් අයා සිටිනා කොකුන් ද ඔවුන්ගේ ජීවිත ඉරණම කඩිනමින්ම විසඳනු ඇත.  

කිසිදු වැස්සක සේයාවකදු නැති අහස් කුස දෙස බලා මිනිසුන් සැමදා හූල්ලති. ඇතැම් දිනවල වහින්නට පෙරමං හදමින් එක්රොක් වන කළු වළාකැටි ද, දැඩි සුළඟත් සමග ඈත නොපෙනෙන ඉසව්වකට ගසා ගෙන යයි. කළ ගොවිතැන් බොහොමයක් ද ජලය නොමැති කමින් විනාශ වී යාම නිසා, ගොවිතැන ජීවිකාව කරගත් සාතිශය බහුතර ජනයා අද අන්ත අසරණ තත්වයකය. 

මේ කියූවේ පසුගිය මාස තුනකට ආසන්න කාලයක් පුරා දකුණේ විශේෂයෙන් හම්බන්තොට ප‍්‍රදේශයට බලපෑ නියං රකුසාගේ තරමය. පෙලොන්නරුව, අනුරාධපුර, අම්පාර සහ මොනරාගල වැනි ප‍්‍රදේශවල තත්වය ද මීට නොවෙනස් නැත.  

එහෙත් නියගය බලපා මාස හතරකට පමණ පසු, පසුගිය දා හම්බන්තොට ප‍්‍රදේශයට සැළකිය යුතු තරමේ වරුසාවක් ඇදහැළුණි. එම වරුසාවත් සමග එතෙක් කොළ හැළී දුඹුරු පැහැවන්ව තිබූ වතුපිටි, දැන් යළිත් කොළ පැහැ ගැන්වෙමින් පවතී. රතට රතේ දළු ළන ගස් ඇසට ප‍්‍රිය උපදවයි. 

මෙම වරුසාව මිනිසුන්ට ද නව බලාපොරොත්තු එක් කර ඇත. වරුසාවත් සමග ළඳු කැළෑ එළි පොහෙළි කර, මහ කන්නය සඳහා මුං, කව්පි, කුරහන්, රටකජු, තල වැනි ධාන්‍ය වර්ග වගා කිරීමට ද මිනිසුන් මේ දිනවල යුහුසුළුව කටයුතු කරමින් සිටිති. 

වැස්සක් දෙකක් ඇද හැළුන ද, මේ ප‍්‍රදේශයෙහි ඇති ගිනිගහන අව්රස්මියෙහි නම් කෙළවරක් නැත. හිසට රෙදි කඩක් දමාගෙන හෝ තොප්පියක් පැළඳ, මහපොළොව සමග මිනිිසුන් හැප්පෙන්නේ එනිසාය. පැය ගණනක් තිස්සේ මෙලෙස මහපොළොව සමග හැප්පීම නම් එතරම් පහසු කටයුත්තක් නොවේ.

ඇතැමෙක් අත්ට‍්‍රැක්ටර හෝ මහට‍්‍රැක්ටර යොදා ගෙන හේන් කෙරුවාව සඳහා පොළොව පෙරළන කාර්යය සිදු කළ ද, මේ මිනිසුන් තම දෑතින්ම එම කාර්යය සිදු කරනුයේ පිරිවැය අඩු කරගනු පිණිසය. තල වපුරා පොලොව පෙරළන්නේ තල ඇට පස්වලට යටවනු පිණිස සහ පස් තට්ටුව බුරුල් වනු පිණිසය. තල ඇට පැළ වී සරුසාරව වැඞීමට එය මහත් පිටිවහළක් ගෙන දේ. මෙලෙස තල වැපිරීමේදී තල ඇට සමග මුසුවන්නේ මහපොළොවේ පස් විතරක්ම නොවේ. මේ මිනිසුන්ගේ දහඩිය කඳුළුය.

මහපොළොව සමග මෙලෙස හැප්පීමේදී ගතට දැනෙන විඩාව පිළිබඳව කැත්ත උදැල්ල අතට ගත්තෙකුට නම් අමුතුවෙන් නොකිවමනාය. එලෙස දැනෙන විඩාව සන්සිඳුවා ගැනීමට උණුසුම් කහට කෝප්පය තරම් විඩාසන්සිඳුවන පානයක් තවත් නැත. අල්ලට සීනි ටිකක් දමා ගෙන නැතිනම් හකුරු කෑල්ලක් සමග උගුරෙන් උගුර කහට කෝප්පයකින් සප්පායම් වූ පසු, තවත් පැය කිහිපයක් ජවයෙන් වැඩකිරීමට එය ගතට මහා සවියක් ගෙන දෙයි.   

තවමත් හම්බන්තොට ප‍්‍රදේශයේ ඇළවේළි සඳහා උඩවළව ජලාශයෙන් ජලය මුදා හැර නැත. ජලය මුදා හැරීමට තරම් ප‍්‍රමාණවත් ජල මට්ටමක් උඩවළවේ ද නැත. මිනිසුන් දැනට කරගෙන යන තක්කාලි, වම්බොටු වැනි වගා සඳහා වතුර ගසන්නේ ද ඇළෙහි ඉතිරිව ඇති දිය ටිකෙනි. වතුර මැෂිමෙන් වතුර ගැසීමට තරම් ප‍්‍රමාණවත් ජල මට්ටමක් නොමැති නම් බොහෝ විට ඇළෙහි අඩි තුන හතරක වළක් හාරා එම කාර්යය සිදු කරති. මන්ද ජලය අඩුවී රොන් මඩ බටය දිගේ මැෂිමට ඇදීගියහොත් සිදු වන්නේ නිකරුණේ තම කාලය ශ‍්‍රමය සහ ධනය නාස්ති කර ගැනීමටය.  

අප කන බත් ඇටේ සිට සෑම භාණ්ඩයකටම අපි මිලක් ගෙවා ලබා ගන්නා බව ඇත්තය. එහෙත් බිම්ටට්ටමේ සිටිනා මේ මිනිසුන් වගුරනා දහඩිය මහන්සියට සැබෑ මිලක් සහ වටිනාකමක් ලැබේ ද යන්න නම් ගැටලූවකි.

ප්‍රීතිමත් ජීවිතයකට මග......

1. දවස අරඹන්න ප්‍රබෝධමත්ව සහ නැවුම් ලෙස.

ඔබේ නිවසේදී වේවා ඔබේ නවාතැනේදී වේවා ඔබේ කාර්යාලයේදී වේවා උදෑසන යමෙකු පළමු වරට හමුවන විට සුහද සිනාවක් සමග '' Good Morning'' කියා ආචාර කරන්න. එය පුද්ගල සබඳතා දිනෙන් දින අලුත් කිරීමට බෙහෙවින් හේතු වේ. 

2. දවස පුරා ප්‍රසන්න මුහුණින් සිටින්න.

ඔබ වඩාත් කැමති ශෝකයෙන් බර, මළානික අයෙකු සමග ඔබේ දවස ගෙවන්න ද නැතිනම් සිනාමුසු මුහුණින් පිරි, විහිළුවක්-තහළුවක් කරමින් විනෝදකාමීව සිටිනා අයෙකු සමග දවස ගෙවන්න ද ?

ඔබේ නිසැක පිළිතුර වනු ඇත්තේ මා දෙවනුවට කී ගණයේ අය සමග සිටීමට ඔබ කැමති බවයි. 

එසේනම් ඔබ මෙන්ම ඔබ වටා සිටින සෙසු අය ද එලෙස ඔබ සිනාමුසු මුහුණින් සිටිනු දැකීමට කැමතිය. සැබවින්ම කෙනකුට ඔබ වෙත සමීප වන්නට සිත් දෙන්නේ ඔබ හොඳ මුහුණුවරකින් (මූඞ් එකකින්) සිටී නම් පමණි.
 
3. උදව් අවැසි අයට උදව් උපකාර කරන්න.

ඔබේ පවුලේ සහෝදර-සහෝදරියන්ට, යහළු-යෙහෙළියන්ට, අසල්වැසියන්ට උදව් අවශ්‍ය විට ඔබට කළ හැකි උපරිමයෙන් උදව් කරන්න.

ඔබේ සහෝදර-සහෝදරියන් නැතහොත් ඔබ සමග එකම නවාතැනේ සිටිනා යහළුවා විභාගයට සූදනම් වන්නේ නම් ඔවුන්ට උදව් කරන්න. මෙය භෞතික උදව්වක්ම විය යුතු නැත. නිදසුනක් ලෙස විභාගයට සූදානම් වන අයෙකු සිටී නම් ඇතැම් විට ඔබට කළ හැකි හොඳම උදව්ව උපකාරය වනු ඇත්තේ ඔබගේ වෙනදා සුපුරුදු චර්යාව මඳක් පාලනය කරගැනීම විය හැක. එනම් වෙනදා මහ හඬින් දැමූ රේඩියෝව හෝ රූපවාහිනිය මඳක් අඩු කර ඇසීම- බැලීම විය හැක.

ඔබ අවිවාහකයෙකු නම් නිවසේදී ඉවුම්පිහුම් කිරීමට, නිවස පිරිසිදු කිරීමට තම මවට කුඩා හෝ සහයෝගයක් ලබා දෙන්න. 

ඔබ විවාහක පිරිමියෙකු නම් විශේෂයෙන්ම ඉවුම්පිහුම් කිරීමේදී සහ ගෙදරදොර කටයුතුවලදී ඔබේ බිරිඳට සහයෝගය ලබාදෙන්න. ඔබ කාන්තාවක නම් සැමියාගේ වැඩකටයුතුවලට උදව් කරන්න. ශක්තිමත් පවුල් සබඳතාවකට එය බෙහෙවින් ඉවහල් වනු ඇත.

බස්රථයක හෝ මගතොට යන එන විට ඔබට අතපාන්නෙකුට සුළු හෝ උපකාරයක් කරන්න. ලංකාවේ නම් බස් රථයකට ගොඩවන මුදල් එකතු කරන්නන්ගේ ප‍්‍රමාණයේ හැටියට ඒ සැමට උපකාර කිරීමට අපට කිසිසේත්ම නොහැක. එමනිසා අඩුම තරමේ ජීවත් වීමට වෙනත් කිසිවක් කරගත නොහැකි තරමට ආබාධිත යැයි හැඟෙන අයෙකුට හෝ පුංචි උපකාරයක් කරන්න. ඉන් ඔබට විශාල මානසික සතුටක් ලැබෙනු ඇත.

ඔබේ යහළුවකු හෝ ඔබේ සේවාස්ථානයේ අයෙකු යම් උදව්වක් ඉල්ලූ විට ඔබට එය කළ හැකි දෙයක් නම් එය නොපිරිහෙළා ඉටු කරන්න. යමෙකු ඔබෙන් උදව්වක් ඉල්ලූ විටක ඔබට හැකියාව  තිබියදී ඔබ එය නොකර සිටී නම් ඔවුන් ද ඔබට උදව් නොකරනු නිසැකය.

4. ඔබේ පවුලට, යහළු මිතුරන්ට ශක්තියක් වන්න.

ඔබ යම් දුකකට-කලකිරීමකට පත්ව සිටින විට, යමෙකු පැමිණ ඔබ සමග සුහදව කතාබස් කොට ඔබට ශක්තියක් වෙයි නම් ඔබට එය කොතරම් දෙයක් ද?

එසේ නම් ඔබ ද ඔබ වටා සිටිනා යහළු මිතුරන්ට ඔවුන්ගේ දුකේදී -වේදනාවේදී ශක්තියක් වන්න. ඔවුන් සමග සිටින්න. ඔවුන්ගේ හිත හදන්න. එවිට ඔවුන් කිසිදිනක ඔබව අමතක නොකරනු ඇත.

5. හුදු විවේචනය පමණක් උරුමකරගත්තෙකු නොවන්න.

මේ කියන්නට යන්නේ කිසිසේත්ම විවේචනය නොකළ යුතු බව නම් නොවේ. එහෙත් එය ප‍්‍රයෝජනවත් සහ සුහද සිතින් කරනා විවේචනයක් විය යුතු බවය. හුදු විවේනයට පමණක් සීමා නොවූ දිරිගැන්වීම්, යෝජනා සහ මගපෙන්වීම් ද සහිත එකක් වියයුතු බවය.

ඔබේ ආයතනයේ සහෝදර කාර්යමණ්ඩලය හෝ යහළුමිතුරන්ව සුහදව තබා ගැනීමට නම් ඔබ අණක් ගුණක් නැති සැරපරුෂ විවේචනයෙන් නම් මිදිය යුතුමය. 

එසේම අවිචාරවත්ව කටමැන දොඩවන්නෙකු වනවාට වඩා පිරිස අතර ඔබ හොඳ සවන්දෙන්නෙකු වන්න. 

6. යමක් කීමට සහ කිරීමට පෙර හොඳින් සිතා බලන්න.

බොහෝ විට සිදු වන්නේ මෙහි අනෙක් පැත්තය. එනම් වැඬේ සිදු වූ පසුව එහි අනිටු ප‍්‍රතිවිපාක ගැන පසුතැවීමය. එමනිසා යමක් කිරීමට පෙර එයින් ඇති විය හැකි ප්‍රතිඵල කෙබඳුදැයි යන්න හොඳින් විමසා බැලිය යුතුය.

එසේම කිසිවිටකත් කටට ආ පළියට වචන පිට නොකළ යුතුය. එහි පාලනයක් තිබිය යුතුමය.

                                      '' මහනෙල් සුවඳමය- කුඩමස පිළීගඳමය
                                       දෙකට එක දියමය- හොඳට නරකට දෙකට කටමය''

යනුවෙන් උපදේශාත්මක කවි ගී ලියවී ඇත්තේ කවියන්ගේ  අත කහනවාට නම් නොවේ.

මෙකී කරුණු ඔබේ එදිනෙදා ජීවිතයට එකතු කරගන්න. ඔබට මානසික සතුටක් වගේම හොඳ ගෙදරදොර පරිසරයක් සහ හොඳ රැකියා පරිසරයක් නිර්මාණය වනු නිසැකයි. 

                                                          ඔබට සදා ජය !!!

ආසනයේ කතාව

මේ දිනවල හතර අතින් ඇසෙන්නේ මීට නොබෝ දිනකට පෙර අවසන්වූ ඌවේ මැතිවරණය පිළිබඳ පශ්චාත් මැතිවරණ විග්‍රහයන් සහ විවිධ දේශපාලනික කතාවන්ය. එමනිසා මෙය ද තවත් එක් දෙශපාලන කතාවක් ලෙස ඔබ සිතනු නොඅනුමානය. නමුත් මේ කියන්නට යන්නේ එවැනි ආකාරයේ දේශපාලන කතාවක් ගැන නම් නොවේ. අප එදිනෙදා යන එන බස්රථවල ඇති මගී ආසනයේ අර්බුදය ගැනයි. 

බස්රථයෙන් ගමන් කිරීමේදී, මගී අසුනක වාඩිවී පහසුවෙන් යාමට අප සැවොම කැමතිය. බස්රථයට ගොඩවූ විගස කොහේ හෝ හිස් අසුනක් තිබේදැයි අප විපරම් කර බලන්නේ ඒ නිසාය. 

බස්රථයෙන් ගමන් කිරීමේදී , හිඳගෙන යාමට මෙතරම් මිනිසුන් කැමැත්තක් දක්වන්නේ බස්රථයේ සිටගෙන සිටිනා විට ලැබෙන්නා වූ ශරීර සම්බාහනය දැරිය නොහැකි තරම් නිසා විය යුතු යැයි සිතමි.

බස් රථය තුළදී  ලැබෙන්නා වූ මෙම සම්බාහන පැකේජය සඳහා සම්පූර්ණ ශරීරය විශේෂයෙන් ඇඟිලිතුඩුවේ සිට උරහිස දක්වා කොටස දිග ඇදීම (Stretching), මගීන් එහාමෙහා යනවිට ලැබෙන්නා වූ පාද සම්බාහනය (Foot Massage), පැටවිය නොහැකි තරමේ සෙනගක් පටවා ගැනීමෙන් ඇතුළත උෂ්ණත්වය වැඩිවීම නිසා ලැබෙන ස්ටීම් බාත් (Steam Bath), අධික තෙරපුම නිසා මස්පිඬුවලට ලැබෙන අමාසුවය ආදිය මේ සම්බාහන පැකේජයට ඇතුළත්ය.

ඊට අමතරව බස්රථය තුළදී, කාන්තාවන් සඳහා විශේෂයෙන් ලැබෙන සම්බාහන ද නැතුවා නොවේ.  

කෙසේ වුව ද, මේ එකදු සම්බාහනයක් හෝ ලැබීමට අප කැමති නැත. එබැවින් සිටගෙන සිටිය ද, නිරායාසයෙන්ම අපේ දෑස් සොයන්නේ කුමන හෝ අසුනක් හිස්ව තිබේද කියාය. එලෙස අසුනක් හිස්ව ඇත් නම් වහා එහි වාඩි වීම අපගේ සිරිතයි. මගී අසුනේ සුන්දර කතාව ඇරඹෙන්නේ මෙලෙස වාඩි වූ මොහොතේ පටන් ය.

ආසනයේ සිටින්නේ තමන් පමණක් නම් මෙහිදී කිසිදු ප‍්‍රශ්නයක් උද්ගත වන්නේ නැත. එසේම, ආසනයේ වාඩිවන අනෙක් තැනැත්තා ආසනයේ ඉඩට සරිළන ප‍්‍රමාණයේ සාමාන්‍ය සිරුරක් හිමි අයෙකු නම්, එවිට ද ප‍්‍රශ්නයක් නැත. නමුත් ප‍්‍රශ්නය උද්ගත වන්නේ අනෙකාගේ ශරීර ප‍්‍රමාණය මගී අසුනට නොසරිළන විටය. එවැනි පුද්ගලයන්ට ද එහි වරදක් පැටවිය නොහැකි නමුත් තමන් අධික ලෙස තරබාරු නම්  ව්‍යායාම ටිකක් හෝ කර ඇඟ අඩුකරගන්නා එක කොයි එකටත් හොඳය.

එකවරම මෙවැනි ලිපියක් ලිවීමට මට සිත් වූයේ මන්දැයි ඔබ සිතනු ඇත. මෙහි පසුබිම් කතාව වැඩි ඈතක නොව අද දිනයේම බස් රථයක් තුළදී මාහට අත්විඳීමට සිදු වූ සිද්ධියකි.

රැකියා ස්ථානය වෙත යාම සඳහා සාතිශය බහුතරයක් සේම මා ද යොදා ගන්නේ පොදු ප‍්‍රවාහන බස් රථය යි. එමනිසා අද දිනයේ ද  සුපුරුදු පරිදි උදෑසන වැඩට යාම සඳහා මම බස් රථයට ගොඩ වුනෙමි. හිඳ ගැනීම සඳහා හිස් අසුනක් නොවූයෙන්, මඳ දුරක් යනතෙක්ම හිටගෙන යාමට මට සිදු විය. උදෑසන කාර්යාල වේලාවෙහි බස්රථවල තිබෙන්නා වූ තදබදය ගැන කිසිවෙකුටත්  අමුතුවෙන් කිවයුතු නැත. 

බස් නැවතුම් කිහිපයකදීම මගීන් දෙතුන් දෙනා බැගින් සිය අසුන්වලින් බැස ගිය ද, ඒ සමීපයෙහි සිටියවුන් එම අසුන්වල වාඩි වූයෙන් මට තවදුරටත් සිටගෙන යාමට සිදු විය. මා ගමන් කළ යුතු සම්පූර්ණ දුරින් හරි අඩක් පමණ යන තෙක්ම, මට මෙලෙස සිටගෙන ගමන් කිරීමට සිදු වූ නමුත් මාගේ වාසනාවට මා අසළ අසුනෙහි හිඳගෙන සිටි කාන්තාව බස් රථයෙන් බැසගිය බැවින්, එම අසුනේ වාඩි වීමේ අවස්ථාව මට උදාවිය.

මෙම අසුනේ ජනේලය පැත්තට වන්නට සිටියේ විසිවයස් පෙනුමැති සාමාන්‍ය සිරුරකින් හෙබි යුවතියකි. අප දෙදෙනා කිසිදු ගැටලුවකින් තොරව පහසුවෙන් ගමන් කළෙමු. බැසිය යුතු ස්ථානයට ළං වූ පසු, ඇය බස් රථයෙන් බැසගියෙන් මා එම අසුනේ ජනේලය පැත්තට වන්නට හිඳගතිමි.

ඉන්පසුව මා සමග අසුන් ගත්තේ තරමක් තරබාරු සිරුරකින් හෙබි අයෙකි. ඔහුට ආසනයේ ඉඩ ප‍්‍රමාණවත් නොවන වග මට සැණෙකින් පසක් විය. ඔහුට අවශ්‍ය ඉඩ සකසා ගැනීම සඳහා ක‍්‍රමයෙන් මා ජනේලය දෙසට තෙරපන්නට ඔහු වෙර දැරීය. අසුනේ කෙළවරටම වන්නට වාඩි වී, මා ඔහුට හැකි උපරිම ඉඩ ලබා දුන් නමුත් ඔහුට එය ද ප‍්‍රමාණවත් නොවීය. ඔහු මා දෙස මඳක් නුරුස්නා අයුරින් බලනු මට පෙනුණි. නමුදු මට කළ හැකි කිසිවක් නැත. 

එලෙස දෙතුන් වරක් මා දෙස බලා ඔහු සිය හඬ අවදි කළේය. 

''එහාට යන්නකො පොඩ්ඩක්........'' 

''ඉන්න පුළුවන් උපරිම කෙළවර තමයි ඉන්නෙ... ඔයාටම පේනවනෙ...'' මම පැවසුවෙමි. 

ඊට පෙරළා ඔහු කුමක් හෝ කියනු ඇතැයි මා සිතුව ද, ඔහු කිසිවක් නොකියා කරබාගෙන සිටියේය. 

මා කල්පනා කළේ ජනේලය අයිනට වන්නට ඔහු සිටියදී , මා අනෙක් පස සිටියේ නම් සිදු වනු ඇත්තේ කුමක් ද කියාය. ඔහු හොඳහැටි ඉඩ රැගෙන වාඩි වනු ඇත. මාහට ඉතුරු වනු ඇත්තේ ශරීරය නියෝජනය කිරීමට පමණක් සෑහෙන කුඩා ඉඩකි. 

බස්රථවල ගමන් කරනා විට මාගේ එක්තරා පුරුද්දක් ඇත. එනම් පිරිමියෙකු වාඩි වී සිටින ආසනයකට වඩා, කාන්තාවක වාඩි වී සිටින අසුනක වාඩි වීමට වැඩි ප්‍රියතාවක් දැක්වීමයි. ඊට හේතුව අන් කිසිවක් නොව කාන්තාවන් සමග මගී අසුනේ හිඳගෙන යාමට ඇති පහසුවයි. එනම් කාන්තාවන්- විශේෂයෙන් තරුණ යුවතියන් අසුන්ගන්නේ ''V'' අකුර සේ කකුල් පළල් කරගෙන නොව ''I'' අකුර සේ කකුල් ළං කරගෙනය. අනෙක් කරුණ නම් ඔවුන්ගේ උරහිස් ද පිරිමින්ගේ මෙන් එතරම් පළල් නොවීමයි. එය ද කාන්තාවන් සමග හිඳගෙන යාමට තවත් හේතුවකි. 

මගී අසුන්වල හිඳගෙන යාමේදී, ඇතැම් අයගේ චර්යාව නම් එතරම් සතුටුදායක නැති බව ඔබ ද පිළිගනු ඇත. ඇතැමෙක් අසුනෙහි වාඩි වන්නේ, කකුල් දෙක ළං කර ගැනීමට අපහසු කුමන හෝ ආබාධයකින් පෙළෙනවුන් ලෙසය. ජනේලය අසළ අසුනේ වාඞී වී කකුල් දෙක පළල් කර ගත්විට, මෙපිට වාඩි වී සිටින්නාගේ පස්ස පමණක් අසුනෙහි තබා, කකුල් දෙක තබා ගැනීමට සිදු වන්නේ බස්රථය මැද මගී ගමන් තීරුවේය.  

මෙවැනි සිද්ධියක් වරක් මාගේ මිතුරෙකුට වූ විට ඔහු එම පුද්ගලයාට මතක හිටිනා පාඩමක් උගන්වා ඇත. 

මගේ මිතුරා දිනක් උදෑසන තම නිවසේ සිට කාර්‍යාලයට බස්රථයෙන් පැමිණෙමින් සිට ඇත. හිස්ව තිබූ අසුනක ඔහු හිඳ ගෙන ඇති අතර අසුනේ ජනේලය පැත්තට වන්නට අසුන්ගෙන සිට ඇත්තේ වයස විසිහතක පමණ  තරුණයෙකි. මොහු මා මුලින් කියූ කකුල් දෙක ළං කර ගැනීමට අපහසු ගණයේ තැනැත්තෙකි. 

මගේ මිතුරා ඉතාමත් සුහදව ''මඳක් කකුල එහාට ගන්නැයි'' ඔහුගෙන් ඉල්ලා ඇත. ඔහු එය නෑසුනා සේ තමා සිටි ඉරියව්වෙන්ම අසුනේ වාඩි වී සිට ඇත. මෙලෙස මඳ දුරක් යනවිට, ඉවසනු බැරිම තැන යහලුවා තම ශරීරවෙර යොදා අසුනේ ඉඩකඩ සකසා ගෙන තිබේ.

මීට අනෙක් පස සිටි තැනැත්තා බෙහෙවින් කිපී, ''ඇයි තමුසෙට මොකද...? '' යනුවෙන් පවසමින් මගේ මිතුරාගේ මුහුනට පහරක් එල්ලකර ඇත.

මොහු නොදන්නා මගේ මිතුරාගේ එක් චරිත ලක්‍ෂණයක් ඇත. වැරැද්දක් සම්බන්ධයෙන් ඔහු එකවරකට වඩා නොඉවසීමයි. එහි ප‍්‍රතිඵලයක් ලෙස එම පුද්ගලයාට උදේ පාන්දරම බඩකටපුරා ගුටි පූජාවකින් සංග‍්‍රහ කිරීමට මිතුරා කටයුතු කර ඇත. උදෑසන රාජකාරියට යාමට හොඳින් හැඳ පැලඳ සිටි මිතුරා, එලෙස පෙරළා පහර දෙනු ඇතැයි ඔහු සිහිනෙකින් හෝ නොසිතන්නට ඇත. 

මෙහි ඇති සිත්ගන්නාසුළු දෙය නම් ගුටි පූජාව පටන් ගන්නා මොහොතේ ගුටිපූජා අපේක්‍ෂකයා සිට ඇත්තේ ජනේලය අසළ අසුනේ වුවත්, ගුටි පූජාවෙන් පසු අපේ මිතුරු ගුටි දානපතියා ජනේලය පැත්තේය. 

සිදුව ඇත්තේ කිසිදු ප්‍රාතිහාර්යයක් නොව මගේ යහළුවා ගුටිපූජාව සිද්ද කර ඇත්තේ අනෙකාට කිසිදු අවස්ථාවක් නොදීය. එනම් ප්‍රතිවාදියාගෙන් පළමු පහර ලැබනවාත් සමගම, ක්‍ෂණිකව අසුනෙන් නැගිට ජනේලය පැත්තෙහි සිටි තැනැත්තාට නොනවත්වා පහරදීගෙන යාමය. ඔහු එයින් බේරීම සඳහා ක‍්‍රමයෙන් ජනේලය පැත්තේ සිට මෙහා පැත්තට සංක‍්‍රමණය වී ඇත. බඩකටපුරා මදි නොකියන්නට කදිම ගුටි පූජාවකින් සංග‍්‍රහ ලැබූ ඔහු, ශුද්ධ සිංහලෙන් අමතමින් බස් රථයෙන් බැස ගොස් ඇත.

මෙවැනි සිදු වීම් බස්රථයේ දෛනිකව ගමන් කරනා අයට එතරම් නුහුරු දේවල් නම් නොවේ. කෙසේ වුවද , බස් රථයේ ගමන් කරනා විට අනෙක් මිනිසුන් ගැන ද අප සිතන්නේ නම් මෙවැනි ආකාරයේ කිසිදු ගැටලුවක් අපට ඇති වන්නේ නැත.