කිසියම් කාසියක් නූලකින් එල්ලා නිශ්චලව තබා ඇතැයි සිතමු. නිදසුනක් ලෙස රුපියල් පහේ කාසියක් ගනිමු. මේ කාසිය දෙස එකිනෙකට වෙනස් දෘෂ්ටිකෝණයන්ගෙන් පුද්ගලයන් 5 දෙනෙකු බලා සිටිනවා යැයි ද සිතමු.
පළමු තැනැත්තා කාසියේ රාජ්‍ය ලාංඡනය සහිත පැත්ත පමණක් හොඳින් පෙනෙන ලෙසත්, දෙවන තැනැත්තා කාසියේ වටිනාකම ආදී තොරතුරු සඳහන් පැත්ත පමණක් පෙනෙන ලෙසත්, තෙවන තැනැත්තා කාසියේ දාරය පමණක් පෙනෙන ලෙසත්, සිව්වන තැනැත්තා කාසියේ රාජ්‍ය ලාංඡනය සහිත පැත්තත් දාරයත් යන දෙපැත්ත පමණක් පෙනෙන ලෙසත්, පස්වන තැනැත්තා කාසියේ වටිනාකම ආදී තොරතුරු සඳහන් පැත්තත් කාසියේ දාරයත් යන දෙපැත්ත පමණක් පෙනෙන ලෙසත් සිටුවා තබා ඇතැයි සිතමු.
එලෙස කාසියේ පස් දෙසින් සිටුවා ඇති පුද්ගලයන් කාසිය දකින්නේ එකිනෙකට සමාන දෘෂ්ටිකෝණයන්ගෙන් ද? නැත. කිසිසේත්ම නැත. ඔවුන්ගේ දෘෂ්ටිකෝණයන් එකිනෙකට වෙනස් නිසා ඔවුන් දකින දේ ද වෙනස්ය.
මෙලෙසින්ම, යම් කාරණයක් පිළිබඳව ඇතැම් විට අප දකින දෘෂ්ටිකෝණයට වඩා වෙනස් දෘෂ්ටිකෝණයකින් වෙනත් අයෙකු දැකිය හැක.
එමනිසා, කිසියම් දෙයක් පිළිබඳව අප දරණ මතය හැමවිටම නිවැරදි නොවිය හැක. ඇතැම් විට නිවැරදි විය හැකි වුවත්, අඩුපාඩු සහිත විය හැක. ඒ පිළිබඳ දැනුවත්බවින් යුතුව අප කටයුතු කරන්නේ නම් බොහෝ විට ගැටලුකාරී තත්වයන් මතු නොවී මානසික සතුටින් යුතුව කටයුතු කිරීමට අපට හැකිවේ.
රටක් පාලනය කරන විට වුව ද, කිසියම් ආයතනයක් හෝ සංවිධානයක් පාලනය කරන විට වුව ද, එසේ නැතිනම් පිරිසක් එකතුව කිසියම් වැඩක් සිදු කරන විට වුව ද, සංවාදශීලිව අන් අයටත් අදහස් දැක්වීමට ඉඩ දී, ඒවායෙහි යුක්තියුක්තභාවය ද විමසා බලා වඩාත් නිවැරදි විදිහට වැඩ කටයුතු සිදු කරන විට කිසිවෙකුටත් තමන්ට ඇඟිලි දික් කිරීමට නොහැක. සිදු කිරීමට යන කාර්යය ද වඩා පිළිවෙළට සිදු වේ.
ඒ සඳහා අවශ්‍ය කරන්නේ තමන් හැමවිටම නිවැරදි ලෙසත්, අන් අය හැමවිටම වැරදි ලෙසත් සිතන අගුළු ළාගත් මනසක් නොව විවෘත මනසකි.
විවෘත මනස නිසැකවම ඔබට බොහෝ ජීවිත ජයග්‍රහණ ළඟා කරදෙනු ඇත.
No comments:
Post a Comment