ආණ්ඩුවේ කිසියම් ප්‍රබලයෙකුගේ අනුදැනුම මත පසුගිය දිනක කඩා දමා තිබූ වත්තල ව්‍යායාම මංතීරුව මසකට නොඅඩු කාලයක් තුළ යළි සකස් කිරීමට අද වැඩ ආරම්භ කළ බව ජනමාධ්‍ය වාර්තා කර තිබුණි. ඒ සඳහා රුපියල් මිලියන 8කට ආසන්න මුදලක් වැය කිරීමටත් නියමිතය.
පුදුමය කියන්නේ එලෙස පොදු දේපල විනාශ කරන්නට නියෝග/උපදෙස් ලබා දුන් වගකිවයුතු කිසිවෙකුත් නීතිය හමුවට නොව අඩුම තරමේ මාධ්‍ය හමුවකටවත් ඉදිරිපත් කිරීමට සොයා ගත නොහැකි වීමය. තමන්ට සිතුණු සිතුණු වෙලාවට සංස්කරණය කළ හැකි නාට්‍ය පිටපතක තත්වයට අද එම සිද්ධිය පත්ව තිබෙනු පෙනේ.
මේ සම්බන්ධයෙන් අපට කීමට ඇත්තේ යහපාලනය ගෙනෙන්නට පුරසාරම් දෙඩුවාට ක්‍රියාවෙන් එය ඉටු නොවන්නේ නම්, එහි පාඩුව සහ අවාසිය මුළු රටටම පමණක් නොව රට කරවන ආණ්ඩුවටත් විඳින්නට සිදු වන බවය.
විශේෂයෙන්ම දැඩි සේ නාගරීකරණය වූ කොළඹ සහ තදාසන්න ප්‍රදේශ ආශ්‍රිතව දිවි ගෙවන මිනිසුන්ගේ ශරීර සුවතාව සඳහා ක්‍රමවත් ව්‍යායාම මංතීරු සහ විවේක ස්ථාන ඉදිකරන්නට පසුගිය රජය විසින් කටයුතු කෙරුණි. එය නාගරික ජනයා වෙනුවෙන් දියත් කෙරුණු ප්‍රශංසනීය ව්‍යාපෘතියකි.
කොටින්ම අඳුරු ගුබ්බෑයමක් ලෙස තිබූ විහාර මහාදේවී උද්‍යානය වැනි ස්ථාන පවා කලඑළි දැක්කේ එවැනි ව්‍යාපෘතිවල මහිමයෙනි. අද පවා නාගරික මිනිසුන් තම ළමා ළපටින් සමග එහි විනෝද වෙන ආකාරය සහ උදේ හවා මිනිසුන් ව්‍යායාම කරන අපූරුව දකින විට අපට නම් ඇති වන්නේ අපමණ සතුටකි. ඒ අන් කිසිවක් නිසා නොව ගම්වල නිදහසේ ඇලේ දොලේ පීනා, පිරිසිදු හුස්ම ටිකක් ගෙන ජීවත් වූ අපට ඇඟවල් ලෙඩ කරවන නාගරික ජීවිතයේ ඇති ආතතිජනක පීඩාකාරීබව හොඳින්ම වැටහෙන නිසාය.
එලෙස පසුගිය රජය සමයේ ඉදිකළ බොහෝ ව්‍යායාම මංතීරු සහ විවේක ස්ථාන අද නිසි නඩත්තුවක් නැතිව තිබෙනු දැකීම සැබවින්ම කණගාටුදායකය.
අඩුම තරමින් ජනතාව වෙනුවෙන් එවැනි අලුත් ව්‍යාපෘති දියත් කරන්නට වත්මන් රජයට හැකියාවක් හෝ වුවමනාවක් නැතිනම්, පසුගිය රජය සමයේ ගොඩනගන ලද එවැනි දෑ ජනතාව වෙනුවෙන් නිසි නඩත්තුවක් යටතේ පවත්වා ගෙන යාමටවත් කටයුතු කිරීම වත්මන් රජයේ යුතුකමය.
තනි පුද්ගලයෙකුගේ හෝ තවත් කිහිප දෙනෙකුගේ ක්‍රියාවක් විය හැකි වුවත්, වත්තල සිදුවීමෙන් පවා ජනතා අපවාදය එල්ල වන්නේ සමස්ත ආණ්ඩුවට බැවින් එවැනි අත්තනෝමතික මුග්ධ ක්‍රියා යළි නොවෙන්නටත් ආණ්ඩුව වගබලා ගත යුතුය.
එසේ නොවුනහොත් වන්නේ නිසැකවම ආණ්ඩුවේ පිරිහීම "තවත්" වැඩිවන එකය.
(පින්තූරය ගත්තෙ මෙතනින්)
No comments:
Post a Comment